Tribute to Kunjunni Maash

ആദരപൂര്‍വം
- പി. അജയകുമാര്‍

ചെറിയ വരികളില്‍ വലിയ ലോകം തീര്‍ത്ത കവിയായിരുന്നു കുഞ്ഞുണ്ണി മാഷ്‌. ഒരു പുതുമയുമില്ലാത്ത വിശേഷണമാണെങ്കിലും സംഗതി അക്ഷരാര്‍ഥത്തില്‍ സത്യം.
ഒന്നാന്തരം എഴുത്തു മാത്രമല്ല, ഒരുപാട്‌ എഴുത്തുകാരെയും ശരിയായ വായനക്കാരെയും അദ്ദേഹം മുളയിലെ വളമിട്ട്‌ വളര്‍ത്തിയെടുത്തു. മലയാളി മാത്രമല്ല, മലയാളവും ഈ വലിയ മനുഷ്യനോട്‌ കടപ്പെട്ടിരിക്കുന്നു; വലുതാണെന്ന വിചാരം അദ്ദേഹത്തിനു തീരെ ഇല്ലായിരുന്നെങ്കിലും.

എപ്പോഴും ചിരിക്കാന്‍ ശ്രമിച്ചു കുഞ്ഞുണ്ണി മാഷ്‌. എല്ലാത്തിലും രസിക്കാനും കഴിഞ്ഞു അദ്ദേഹത്തിന്‌. ഒരു അഭിമുഖത്തില്‍ മാഷ്‌ പറഞ്ഞു: "എനിക്കു രസകരമല്ലാത്ത ഒരു സംഭവവും ഉണ്ടായിട്ടില്ല. ഒക്കെ രസകരം തന്നെ."
സഫലമായ ആ ജീവിതത്തേക്കുറിച്ച്‌ നഷ്ടബോധത്തോടെ ഓര്‍ക്കുമ്പോള്‍ ഒരു പ്രാര്‍ഥന മാത്രം: മരണവും അദ്ദേഹത്തെ രസിപ്പിച്ചിട്ടുണ്ടാവണേ.

രണ്ടു കുഞ്ഞുണ്ണിക്കവിതകള്‍ ഓര്‍മ വരുന്നു:
1.
ജീവിതം നല്ലതാണല്ലോ
മരണം ചീത്തയാകയാല്‍

2.
ഉടുത്ത മുണ്ടഴിച്ചിട്ടു
പുതച്ചങ്ങു കിടക്കുകില്‍
മരിച്ചങ്ങു കിടക്കുമ്പോ
ഴുള്ളതാം സുഖമുണ്ടിടാം.

കുഞ്ഞുണ്ണി മാഷിന്റെ ആത്മാവിനു നിത്യശാന്തി.


കുഞ്ഞുണ്ണി മാഷ്‌ വരച്ച രണ്ടു ചിത്രങ്ങള്‍.

(photo courtesy: poorna publications, kozhikkode, kerala)